O Partido Popular de Galicia (PPdeG) criticou os “malos tratos” que, ao seu xuízo, o Goberno central está a someter a Vigo en materia ferroviaria ao “vender fume” e levar a cabo unha serie de “promesas sen cumprir” sobre a chegada do AVE á cidade e ao resto da Comunidade.
Así o sinalaron este venres nunha visita da secretaria xeral do partido, Paula Prado, á estación intermodal olívica, onde estivo acompañada da candidata ‘popular’ ás eleccións municipais, Marta Fernández-Tapias. Prado lembrou que a secretaria de Estado de Transportes, Isabel Pardo de Vera, prometeu que os trens Avril, que permitirán a chegada da alta velocidade a Vigo, comezarían a operar o verán pasado, máis tarde dixo que en outubro e logo no primeiro trimestre de 2023.
“O socialismo o único que fai é vender fume e non cumprir con Galicia. Seguimos cos trens máis vellos de España, os máis caros, esquecidos polo Goberno”, lamentou, indicando que probablemente estes convois non comecen a circular nin sequera este verán. Na mesma liña a falado Fernández-Tapias, pondo o foco na perda de conexións que sufriu Vigo durante a pandemia e que nunca se recuperaron, indicando que esta falta de trens dificulta aos usuarios poder comprar un billete, xa que os coches están cheos.
A tamén delegada da Xunta en Vigo referiuse a os atrasos dos trens Avril e á “burla” que supón que o PSOE diga que o AVE a Vigo por Cerdedo “está ao caer”, lembrando que o que era ministro e agora alcalde, Abel Caballero, prometeu que en 1993 chegaría a alta velocidade á cidade. “Estamos no 30 aniversario”, chanceou, criticando que aínda se segue esperando.
