A Delegación do Goberno contra a Violencia de Xénero confirmou o asasinato dunha muller en Baiona como violencia de xénero, o que supón a vítima 1.190 por violencia machista desde que se iniciaron os rexistros en 2003 e a oitava muller asasinada no que vai deste ano.
A vítima mortal, de 47 anos, foi asasinada este domingo 5 de febreiro, supostamente, pola súa ex parella. O home foi detido este luns en Ourense.
O delegado do Goberno en Galicia, José Miñones, expresou a súa “firme repulsa” e a do Executivo central por este novo crime machista e enviou o seu “afecto e apoio aos familiares e amizades”. “Non pararemos até que cada muller poida vivir libre e segura”, subliña Miñones, a través das súas redes sociais.
A Delegación do Goberno en Galicia convocou, para este martes, un minuto de silencio ante a sede institucional, na Coruña, para condenar este novo crime machista. Será ás 9,15 horas.
Ademais, están previstas concentracións de repulsa por toda a xeografía galega ante as casas consistoriais.
