Un tren Media Distancia con destino Vigo detívose á primeira hora da mañá deste martes na parada de Arcade, pertencente ao municipio de Soutomaior, por unha avaría que o deixou sen sistema anticonxelación. A solución alternativa habilitada por Renfe provocou que os pasaxeiros chegasen con case unha hora de atraso á cidade olívica.
Segundo informan a Europa Press fontes de Renfe e de Adif, trátase da Media Distancia que saíu da Coruña ás 7,00 da mañá e que estaba previsto que chegase á estación de Vigo-Urzaiz sobre as 8,30 horas.
O convoi detívose na bifurcación de Arcade por esta avaría provocada pola baixada do pantógrafo –a conexión do tren co tendido eléctrico– e os pasaxeiros que se atopaban a bordo deste concorrido servizo tiveron que baixar na estación. Seguidamente, Renfe habilitou un transporte alternativo de modo que o seguinte Media Distancia que pasaba por este punto recolleu á metade dos viaxeiros, que chegaron a Vigo 45 máis tarde do previsto.
Unha vez en Urzaiz, este tren deu a volta para regresar a Arcade a recoller aos restantes, que no seu caso sufriron un atraso de aproximadamente unha hora na chegada á cidade olívica. Fontes de Renfe recalcan a Europa Press que non houbo máis afectacións na liña, senón que se tratou dunha “incidencia puntual”.
