O secretario xeral do PSdeG, Gonzalo Caballero, reclamou este xoves a implicación de “todas as administracións” para que a feira Conxemar siga sendo “referente” do sector tanto a nivel nacional como internacional.

En declaracións aos medios antes de visitar a feira, que se celebra no Instituto Feiral de Vigo, o líder dos socialistas galegos apostou porque o certame “siga sendo a principal referencia desde España para o mundo, en materia de conxelados de peixe, de industria do mar”.

Respecto diso, “fronte a outras feiras que empezan a ter puxanza”, engadiu, “todas as administracións, desde o Goberno de España á Xunta, as provinciais e as locais” deben “impulsar” a Conxemar para que manteña ese liderado. “Porque esta industria, en Vigo e en Galicia, é unha industria de vangarda, de calidade e ten acreditada toda a súa capacidade”, proclamou.