O alcalde de Vigo, Abel Caballero, anunciou este venres a conxelación dos impostos municipais para o exercicio 2022, no que non se aplicará o IPC ás taxas, co fin de “consolidar” a recuperación postCovid.

Así o trasladou o rexedor olívico nunha rolda de prensa, na que proclamou o seu desexo de ter este “xesto” cos vigueses nun contexto difícil e no que é necesario apontoar a “recuperación que xa está a haber en Vigo”.

Caballero lembrou que xa o ano pasado a subida nominal de impostos foi “cero” ao non actualizarse as taxas co IPC. No ano 2022, o Concello de Vigo deixará de ingresar 4 millóns de euros (os correspondentes á subida do 3,5 % do IPC), que “quedarán no peto dos vigueses”.

O alcalde engadiu que a administración aplicará exencións fiscais en 2022 por valor de 17 millóns de euros, dos que a metade se corresponden con impostos (IBI, vehículos, plusvalía, IAE e ICIO) e a outra metade proceden de taxas e prezos públicos que non se cobran, por exemplo, polo uso que fan entidades deportivas das instalacións municipais, ou a “taxa cero” das terrazas de hostalaría.