O V Underfest SON Estrela Galicia encherá de música varios escenarios vigueses entre o 22 e o 25 de setembro, con propostas como as de Michael Kiwanuka, Sara McCoy ou Doutor Explosion. O festival foi presentado este martes en Vigo pola delegada da Xunta, Marta Fernández-Tapias e o portavoz da promotora Sweet Nocturna, David Lago.

Así, esta cita do outono musical vigués, que conta co patrocinio da Xunta a través da marca FEST Galicia e con subvención da Consellería de Cultura, ofrecerá diferentes concertos no Auditorio Mar de Vigo, o museo Marco, A Iguana, a Sala Kominsky, Mogambo, Radar, Reserva e Masterclub.

O cartel do festival está encabezado por Michael Kiwanuka, unha das mellores voces do ‘soul’ actual e un dos artistas “máis solicitados” nos festivais, segundo apuntou David Lago.

Así mesmo, o Underfest leva a Vigo aos belgas Goose, ao londiniense PM Warson, a americana Sarah McCoy ou os suecos Diamond Dogs, e a oferta compleméntase con artistas nacionais como Hidrogenesse, Doutor Explosion, Judeline, Cupido ou Queralt Lahoz, entre outros.

O programa complétase coa exposición interactiva ‘Erro! Design, 20 years of music artwork’, composta por máis de 30 pezas do artista catalán Xavi Forné. A mostra, que abrirá este mércores na Galería Maraca da cidade olívica (e poderá visitarse ata o 15 de outubro), fai un percorrido por dúas décadas de cartelismo musical.