A Audiencia Provincial de Almería acordou deixar en liberdade ao futbolista vigués condenado a catro anos de cárcere en primeira instancia por abuso sexual, Santi Mina, quen finalmente compareceu en persoa para “sorpresa” do tribunal na vista onde se decidía sobre a petición de ingreso en prisión realizada pola acusación particular.
A Sección Terceira autorizáralle a intervir mediante videoconferencia desde Arabia Saudita, en cuxa liga milita desde agosto.
O tribunal tivo en conta para tomar esta decisión que, ao longo de todo o proceso xudicial, o futbolista, quen accedeu ao Palacio de Xustiza por unha porta de emerxencia lateral, “sempre estivo a disposición” da Xustiza e comunicou os cambios de residencia, polo que concluíron “que non hai risco de fuga”.
Así mesmo, a Sección Terceira rexeitou a retirada de pasaporte que solicitou o Ministerio Fiscal despois de que Mina decidise trasladarse a un país sen convenio de extradición con España e tan só pediulle que continúe comunicando cada cambio de residencia que poida ter.
“ESTRATEXIA PROCESUAL”
Ao termo da comparecencia do artigo 505 da Lecrim, que se prolongou máis dunha hora e media, e na que Mina só puido intervir facendo uso do seu dereito á última palabra despois de que o tribunal non accedese á súa petición de declarar, a súa avogada, Fátima Magdalena Rodríguez, xustificou a aparición súbita do seu cliente como “estratexia procesual”.
“Veu porque el non foxe da Xustiza. El non ten ningún medo e non ten nada que ocultar. El non puido dicirnos ata o último momento se podía vir ou non porque, como sabedes, tivo partido ata hai dous días”, dixo para engadir que o propio tribunal “non sabía que viña”.
“A DISPOSICIÓN DA XUSTIZA”
Ao fío disto, afirmou que a decisión de desprazarse desde Arabia Saudita ata Almería responde á súa intención de demostrar que “el esta a disposición da Xustiza sempre que o necesite, nada máis”.
“Ao final o que queremos demostrar é que Santiago Mina non ten medo á Xustiza. E que el está aquí sometido á lei española e aos tribunais españois. E vai estar sempre que se necesite. Como fixo hoxe. Sabendo que se podía adoptar unha medida cautelar de prisión provisional ou de retirada de pasaporte”, precisou a avogada do futbolista.
SEGUE “AO SEU LIBRE ARBITRIO”
Pola súa banda, o avogado da vítima, tras a resolución que se ditou ‘in voce’ a petición do condenado, considerou “incomprensible” que dadas as circunstancias e, a pesar da petición do fiscal, o tribunal “nin sequera acordase a retirada de pasaporte e o único que lle impuxo é que determine cal é o seu domicilio en Arabia Saudita”.
