O acusado dun delito de tentativa de homicidio tras cravarlle varias veces un desaparafusador a outro home na terraza dunha cafetaría en Vigo aceptou este martes catro anos de cárcere tras recoñecer os feitos.

Nun acordo de conformidade alcanzado na sección quinta da Audiencia provincial de Pontevedra, con sede en Vigo, o agora condenado, que xa se atopa en prisión, aceptou unha pena de catro anos por tentativa de homicidio.

A pesar de que Fiscalía pedía ata oito anos de prisión, aplicáronselle as atenuantes de trastorno psíquico e reparación do dano, xa que pagou ao prexudicado uns 2.300 euros. Entre as penas tamén se inclúe a responsabilidade civil de máis de 1.370 euros a pagar ao Servizo Galego de Saúde (Sergas) polos tratamentos realizados para curar á vítima.

Ademais, estableceuse unha orde de afastamento de polo menos 200 metros do prexudicado durante oito anos, ademais da prohibición de contactar por calquera método co mesmo.

Segundo recollía o escrito de acusación pública, os feitos ocorreron o mediodía do 10 de agosto de 2021, cando o acusado se dirixiu a outro home que estaba na terraza dunha cafetaría na rúa Zamora e lle cravou un desaparafusador duns 20 centímetros no tórax e o abdome.

A Policía Nacional informou no seu día da detención deste home, que está en prisión provisional desde o 12 de agosto de 2021, e sinalou que o acusado atacara ao outro home porque lle atribuía unha relación sentimental coa súa muller. Cando os axentes foron a buscalo á súa casa, o home recoñeceu os feitos e entregouse, alegando que “o cárcere está feita para homes”.