’13 editora’ é o nome da editorial que iniciará a súa andaina dende Vigo o próximo sábado, 14 de maio. O selo abre unha nova vía para a literatura galega a través da súa especialización en textos centrados no activismo e nos procesos de construción de contrapoder.

O obxectivo central da editorial é “propiciar a construción dun tecido social proactivo e analítico que contribúa a conformar un mundo máis xusto a través de olladas e discursos de carácter plural”, explica o equipo nun comunicado. Para iso publicará manuais e ensaios, tanto académicos como divulgativos, relacionados co eido do empoderamento e a organización colectiva.

O catálogo, indican, conformarase por títulos de autorías e xeografías diversas que tratarán cuestións relacionadas coa construción de alternativas e resposta social. Os libros permitirán que as persoas e as organizacións dispoñan de materiais de calidade cos que mellorar o seu funcionamento e impacto, así como a súa análise da realidade.

A editora, que tivo que adiar a súa saída por mor da COVID-19, desenvolverá a súa presentación no contexto da celebración do día das letras galegas, no Espazo Simia de Vigo ás 20:00, onde expoñerá as liñas principais do proxecto.

O selo 13 editora é un proxecto editorial sen ánimo de lucro de carácter independente que xorde ao abeiro de ECOAR))). A editorial é un proxecto de formación e información social, económica, política e cultural que pretende producir contidos que espallen o pensamento crítico e alternativo así como o coñecemento relacionado co eido do activismo e a mobilización social. Trátase dun “proxecto sostible e autoxestionado, que traballa dende un enfoque crítico”, sinalan nun comunicado.