Veciñanza das poboacións viguesas de Beade, Bembrive, Sárdoma e Castrelos manifestáronse este sábado en Vigo apoiados pola Plataforma de afectados polo viario de Beade (Avibe) e organizacións ecoloxistas como Adega, Amigos da Terra ou Greenpeace, para denunciar as consecuencias que podería provocar no rural vigués o tramo do viario de alta capacidade PO-010 A Balsa-Baruxáns.
Baixo o lema “Salvemos ou rural de Vigo”, decenas de persoas situáronse nos pasos de peóns da Praza de América para solicitar a viandantes e condutores “que tomen partido para axudalos a protexer a pouca natureza que queda á cidade”, indicou Avibe.
Desta forma, as entidades convocantes buscan o apoio da cidadanía viguesa para concienciar sobre “os beneficios de conservar a biodiversidade e o rural“, facendo fincapé nos “custos ambientais e sociais irreversibles” que a iniciativa do viario tería sobre o rural vigués. Ademais, desde a plataforma de afectados apuntaron que esta estrada “favorecería a entrada masiva de vehículos na cidade”.
A portavoz de Avibe, Ana Pascual, manifestou durante o acto que o rural e a biodiversidade dos arredores da cidade olívica “son vitais para a saúde ambiental do Concello”, polo que solicitou á poboación viguesa que lles “axuden a protexer a pouca natureza que nos queda e que lle digan connosco ao Concello que non ten sentido insistir en construír unha estrada que non é necesaria”.
