Decenas de persoas concentráronse na mañá deste mércores en Vigo para reclamar condicións “dignas” para as persoas de axuda no fogar. Unhas mobilizacións convocadas pola CIG-Servizos que se levaron a cabo diante das instalacións das empresas Atendo e Clece.

Todo iso tras o recente anuncio da central sindical informando de que non continuará participando na negociación do novo convenio colectivo do sector mentres non se actualicen os soldos co incremento do 6,5% do IPC de 2021 en todos os conceptos económicos do documento actual. Esta reclamación é precisamente a que encabezaba as concentracións desta mañá, cunha pancarta que rezaba: ‘O 6,5 non se negocia. Por un convenio digno’.

Nun comunicado, a CIG explicou que na primeira reunión negociadora se lle trasladou ao empresariado a necesidade de actualizar as táboas salariais de 2022, “pero negáronse a facelo”. A esta proposta sumáronse tamén o resto de sindicatos que participaban no encontro.

Nesa reunión, a patronal propuxo un novo encontro, ao que levarían unha proposta económica para toda a vixencia do convenio. “Ante isto, deixamos claro que non nos conformamos só cun incremento económico, senón que hai que incorporar cuestións que necesita o sector como reducir a xornada, regular os descansos ou percibir o 100% do salario en caso de incapacidade temporal“, engadiu a CIG.

Ademais, reivindicaron que non van asistir a esa ou a outras reunións de negociación mentres non se lles pague a todos os traballadores o 6,5% que lles corresponde. “Non se pode negociar un novo convenio cando non se cumpre o actual. O 6,5% non se negocia. Actualización salarial xa”, sentenciaron.