O Concello de Vigo estimou parcialmente a reclamación dunha viandante que sufriu unha caída debido ao mal estado do pavimento nunha beirarrúa da cidade, e compensaraa en algo máis de 14.000 euros polos danos e secuelas sufridas, ademais doutros gastos.

Nunha resolución do departamento de Patrimonio, o consistorio admite que é responsabilidade da administración manter en bo estado o pavimento e que o lugar onde se produciu a caída (en marzo de 2019), na confluencia das rúas Gran Vía e Honduras, non estaba en boas condicións. De feito, cando se produciu o accidente, interveu a Policía Local, que tomou fotografías onde se reflectía que había varias lousas rotas e levantadas (que foron reparadas posteriormente). Esta circunstancia foi ratificada polas testemuñas.

Deste xeito, estima parcialmente a reclamación de responsabilidade patrimonial da muller, que sufriu danos no pulso, e que tivo que ser intervida, ademais de padecer artrose postraumática. O Concello fixou a indemnización en 14.112,83 euros, pero a prexudicada, representada pola avogada Ana Quiroga, recorrerá para lograr unha reparación integral do dano polas secuelas e os intereses.