A Cámara de Comercio de Pontevedra, Vigo e Vilagarcía anunciou este mércores a posta en marcha dunha “ofensiva” en varias frontes para presionar ao Goberno de España e lograr que reconsidere a súa decisión de deixar a planta de Stellantis na cidade fóra da rede de moi alta tensión, tal e como se recolle na planificación de Rede Eléctrica ata 2026.
Nunha rolda de prensa, o presidente e o vicepresidente do organismo cameral, José García Costas e José Manuel Fernández Alvariño, trasladaron a necesidade de “remover as augas” ante o “inmobilismo da sociedade civil”, que “non dixo nada” tras a confirmación desa noticia, e advertiron de que esa conexión á moi alta tensión é determinante na competitividade da factoría e afecta moi directamente ao sector, estratéxico na economía da comarca e de Galicia.
Segundo sinalou García Costas, el mesmo levará esta cuestión á reunión do Consello de Cámaras da semana que vén, e farán xestións tamén para solicitar o apoio da Confederación de Empresarios de Galicia e da CEOE, así como da Xunta e do goberno municipal de Vigo.
Na mesma liña se pronunciou Fernández Alvariño, quen tachou de “incomprensible” a decisión do Goberno, e incidiu en que, a pesar da afirmación do Executivo de que a factoría non cumpre os requisitos para ter moi alta tensión, ese enganche “non é inviable”. Ademais, os responsables da Cámara de Pontevedra, Vigo e Vilagarcía avanzaron que tamén demandarán medidas para que poida instalarse unha planta de baterías na cidade, xa que “o lóxico” é que o máis produtivo fabricante de automóbiles de España teña preto esa instalación.
MOCIÓN NO PLENO MUNICIPAL
Pola súa banda, o pleno de Vigo aprobou este mércores unha moción presentada polo Partido Popular na que se solicita ao Goberno central que rectifique e inclúa a conexión de Vigo á rede de moi alta tensión na súa planificación para 2021-2026, así como a construción dunha nova subestación en Balaídos.
Neste sentido, o portavoz ‘popular’, Alfonso Marnotes, criticou que o Executivo non “escoite” as necesidades do sector, xa que non inclúe a Stellantis Vigo dentro da rede de moi alta tensión, como solicita a empresa desde hai anos. Tamén lamentou as condicións do Proxecto Estratéxico para a Recuperación e Transformación Económica (Perte) do Vehículo Eléctrico porque a industria “tampouco o apoia”.
