A Xunta de Galicia saíu ao paso este martes das palabras do alcalde de Vigo, Abel Caballero, sobre a presenza das illas Cíes nunha listaxe de destinos turísticos internacionais publicado por The New York Times (que o rexedor atribuíu á campaña municipal para que sexan Patrimonio da Humanidade), e precisou que o emblemático periódico americano “fai fincapé” en medidas adoptadas pola administración autonómica, como encargada da xestión dese espazo natural.

Así, a través dun comunicado, a delegada territorial do goberno galego en Vigo, Marta Fernández-Tapias, celebrou que un medio “tan prestixioso” mencione as illas Cíes e subliñe medidas como a limitación do número diario de visitantes para protexer o arquipélago e evitar a masificación.

Nese sentido, apuntou que o texto de The New York Times destaca os “estritos esforzos de conservación, incluídas as restricións fronte a vehículos, establecementos hostaleiros e ruídos“, o que “deixa en moi boa posición a xestión da Xunta”.