O alcalde de Vigo, Abel Caballero, criticou este martes a “incapacidade” da Xunta de Galicia para ter terminada a ampliación do Instituto Feiral (Ifevi) para a próxima celebración da feira Conxemar, a principios de outubro, e apuntou que “é unha obra menor, non o Empire State”.
Nunha rolda de prensa, o rexedor olívico lamentou que a feira internacional de produtos conxelados se vaia celebrar entre o 5 e o 7 de outubro sen que a Xunta fose capaz de ter a ampliación do recinto lista. “Conxemar non vai dispor de todo o espazo pola calamidade da Xunta”, insistiu Caballero, aínda que a organización do certame non chegou a ofertar espazos na superficie ampliada.
O alcalde lembrou que, en maio pasado, a conselleira de Infraestruturas e Mobilidade, Ethel Vázquez, visitou o recinto feiral e insistiu en que a ampliación estaría lista para Conxemar. “Dixeron que ía haber un módulo deportivo, mentira; que ían acabar a tempo a ampliación, mentira. Todo mentira”, proclamou Caballero.
Segundo lembrou, o goberno local advertiu á administración autonómica de que tería que empezar antes a obra, e constatou que agora non está lista, a pesar de que “é unha obra menor, non é o Empire State”.