As principais obras da Cidade da Xustiza de Vigo finalizarán este ano a pesar da crise sanitaria

Este ano remataranse os edificios externos, a escola infantil e as urbanizacións.

Obras no antigo Hospital Xeral para a Cidade da Xustiza / © Miguel Núñez.

A data prevista para a finalización dos principais traballos de construción da Cidade da Xustiza de Vigo mantense para finais de 2020 a pesar da afectación da crise sanitaria.

Deste xeito, este ano terminaranse os edificios externos, a escola infantil e as urbanizacións, mentres que parte dos revestimentos interiores quedarán pendentes, segundo trasladou a Vicepresidencia e Consellería de Presidencia, Administracións Públicas e Xustiza.

Precisamente, este martes, o vicepresidente da Xunta, Alfonso Rueda, reuniuse co arquitecto da obra, Alfonso Penelas, para abordar as consecuencias da pandemia na execución dos traballos. Así, o arquitecto destacou que “grazas ao esforzo e o compromiso” da construtora co proxecto puidéronse manter os prazos establecidos a pesar das restricións impostas para evitar a propagación da COVID-19.

En concreto, as obras dos novos xulgados da cidade suspendéronse durante parte do tempo no que permaneceu vixente o estado de alarma e foi preciso reducir o número de operarios para garantir o cumprimento das medidas sanitarias. De feito, na actualidade, as obras son levadas a cabo por 140 traballadores, aínda que esta cifra podería incrementarse ata os 200 de acordo coa normativa sanitaria.

Así mesmo, a aplicación de Expedientes de Regulación Temporal de Emprego (ERTE) en empresas subcontratadas e os problemas para acceder a subministracións de materiais de empresas nacionais e de terceiros países nos que se propagou o coronavirus afectaron á execución dos traballos.