Os pasaxeiros creceron un 6,9% e un 2,1% nos aeroportos de Santiago e A Coruña durante o mes de novembro, respectivamente, mentres que baixaron un 16% no de Vigo, segundo os datos que publica este martes Aena.

En concreto, Lavacolla, na capital galega, rexistrou en novembro un total de 201.069 pasaxeiros, un 6,9% máis que no mesmo mes do ano anterior. Do total de pasaxeiros comerciais, 196.871, correspondéronse 169.043 con voos nacionais e 27.828 con internacionais. En canto a operacións, contabilizou 1.503 voos, un 1,3% máis, dos cales 1.432 foron comerciais (1.199 nacionais e 233 internacionais). Ademais, a terminal de carga compostelá manexou durante o undécimo mes do ano ao redor de 277,4 toneladas de mercadoría, o que supón un descenso do 3,7%.

Pola súa banda, por Alvedro, na capital herculina, pasaron 106.033 pasaxeiros, un 2,1% máis. Deles, 105.230 utilizaron voos comerciais, 96.189 en traxectos nacionais e 9.041 en internacionais. O aeroporto coruñés anotouse 1.217 voos de operacións, 873 deles comerciais que, á súa vez, repartíronse entre 784 nacionais e 89 internacionais. O tráfico de mercadorías moveu aquí máis de 11,5 toneladas de carga.

BAIXAN EN VIGO

Por último, Vigo rexistrou 71.575 pasaxeiros en novembro, un 16% menos que no mesmo período de 2018, de acordo coas cifras que fai públicas este martes Aena. Do total, 71.536 utilizaron voos comerciais. En canto a operacións, neste aeródromo contabilizáronse 821 voos, un 9,5% menos, dos que 722 foron comerciais (669 operacións nacionais e 53 internacionais). Ademais, pola terminal de carga do aeroporto vigués pasaron durante o pasado mes 46,3 toneladas de mercadoría.