A candidata do PP á Alcaldía de Vigo, Elena Muñoz, reivindicou ao seu partido como a única alternativa ao PSOE e lamentou que o candidato deste segundo partido, Abel Caballero, non participase ningún debate con ela.
Deste xeito, criticou que a postura do rexedor e candidato á reelección impedise aos vigueses “contrastar” os distintos programas electorais das formacións que se presentan ás eleccións municipais deste domingo na cidade.
Nesta liña, acusou a Abel Caballero de “subirse a un pedestal” do que “non quere en ningún caso baixar” e pediu o voto para o PP co obxectivo de establecer un “control democrático” ante o “absolutismo” do actual alcalde. Neste sentido, advertiu de que a formación Marea de Vigo pactaría co PSOE se fose preciso, polo que, ao seu xuízo, só o PP representa unha alternativa á formación socialista.
Ademais, criticou que o goberno local levase a cabo un “aluvión de obras” xusto antes dos comicios, o que, en opinión de Muñoz, demostra a súa inacción durante o últimos catro anos.
Así, lembrou que é “ilegal” que Caballero inaugure obras en período electoral e anunciou que actuará deste xeito coas levadas a cabo en Praza de América. Sobre esta remodelación, criticou tamén que custase dous millóns de euros que poderían destinarse ás parroquias rurais.