O Sindicato de Pensionistas e Xubilados de CC.OO. de Vigo demandou o apoio da corporación municipal olívica que se constitúa despois das eleccións do 26 de maio para a súa proposta de transformación do antigo Hospital Cíes nun centro para persoas maiores.

Mediante un comunicado, volveu a insistir na necesidade de que a corporación asuma esta iniciativa como “un proxecto da cidade” a través dunha declaración institucional e co obxectivo de que a cidadanía o teña en consideración á hora de votar.

A proposta de crear este centro foi apoiada pola Asociación de Comerciantes de Santa Rita, a Asociación de Veciños de San Roque, a Federación de Asociacións Veciñais Eduardo Chao (Favec), a Plataforma pola Defensa da Sanidade Pública, o Colexio de Arquitectos e a familia Bar Boo, entre outras organizacións.

En concreto, o Centro Gerontológico exposto prestaría unha atención especializada a persoas maiores con dependencia leve ou moderada que poidan vivir con certa autonomía baixo a tutela dunha entidade pública. Na proposta tamén se inclúe a creación dun observatorio xerontológico de ámbito autonómico que estea centrado na investigación, a promoción, a innovación e o desenvolvemento tecnolóxico nesta área.