Varias navieras e establecementos de hostalaría demandaron unha reunión coa conselleira de Medio Ambiente, Infraestruturas e Vivenda, Anxos Vázquez, para abordar a limitación do número de visitantes ao Parque Nacional das Illas Atlánticas, que consideran que afectan os intereses do sector.

Nun comunicado, denunciaron que non se contou coa súa colaboración no desenvolvemento do Plan Reitor de Usos e Xestión (PRUX) do parque nacional e esixiron á Consellería que detalle os criterios técnicos tidos en conta para a súa redacción, así como que escoite as súas demandas.

Así mesmo, insistiron en que o interese en que as illas sexan recoñecidas como Patrimonio da Humanidade pola Unesco non xustifica a limitación da afluencia durante a tempada alta, xa que, segundo apuntaron, o Parque Nacional do Teide, que conta con este recoñecemento, recibe uns 13.000 turistas ao día.

Mentres, a Xunta fixou o número máximo de visitantes diarios para as Illas Cíes en tempada alta en 2.800 persoas e, o das Illas Ons, en 1.800. Durante a tempada baixa a cifra redúcese a 450 turistas en ambos os casos.

O sector, pola súa banda, aposta por fomentar actividades de coñecemento do medio para preservalo e advirte de que a limitación das visitas ameaza a “sustentabilidade económica” do sector turístico das Rías Baixas.