Detido en Vigo un home acusado de agredir a súa parella por recriminarlle que consumira cocaína

Un home de Antas de Ulla (Lugo), A.P.C., foi detido por un suposto delito de violencia de xénero contra a súa parella cometido este luns pola noite en Vigo.

Violencia machista / Macnolete en Flickr www.flickr.com/photos/macnolete/2599959533

Un home de Antas de Ulla (Lugo), A.P.C., foi detido por un suposto delito de violencia de xénero contra a súa parella cometido este luns pola noite en Vigo.

Segundo indicou a Policía Local nun comunicado, os axentes deste corpo de seguridade foron comisionados pola Central de Información e Mando este luns ás 22,50 horas para dirixirse a unha vivenda de rúa María Auxiliadora onde, ao parecer, tivera lugar o suceso.

Unha vez no lugar dos feitos, os funcionarios entrevistáronse coa presunta vítima, que portaba ao fillo de ambos en brazos. A muller manifestou que o suceso se produciu no marco dunha discusión motivada polo consumo de cocaína por parte da súa parella, que adoptara unha actitude violenta despois de que ela lle recriminase a súa actuación.

Unha vez que, segundo explicou a muller,  se refuxiou nunha habitación, puido contactar coa policía, aínda que, finalmente, a súa parella puido acceder ao cuarto e retirarlle o teléfono móbil, polo que ela procedeu a fuxir da vivenda con outro terminal.

Os axentes comprobaron que había múltiples obxectos tirados polo chan do piso no que supostamente se produciron os feitos e que a muller presentaba unha lesión. Por iso, baixaron á rúa para identificar e deter ao home, que procedeu a ameazar verbalmente á vítima.