O alcalde de Vigo, Abel Caballero, confirmou que as obras do aparcadoiro municipal que se abrirá á beira do hospital Álvaro Cunqueiro están “practicamente” acabadas e que ese servizo está “a piques de abrir só para xente de Vigo”.

A preguntas dos medios nunha rolda de prensa, o rexedor precisou que o aparcadoiro disporá dunhas “máquinas de control” e que non descarta que a súa utilización se regule a través da controvertida tarxeta PassVigo (que até agora se usa só para o bus urbano e sobre a que pesa un auto xudicial que anula a esixencia de estar empadroado na cidade para poder dispor dela).

Segundo indicou Caballero, o goberno municipal buscará “unha fórmula” para que este aparcadoiro sexa gratuíto só para os vigueses. Así, incidiu, terá “subvención” pero, “para estar subvencionado, tense que estar empadroado en Vigo”.