O secretario de Estado de Internacionalización de Portugal, Eurico Brilhante Días, defendeu a importancia da transformación dixital para a “cooperación” entre o tecido empresarial galego e o do país luso.

No marco dunha visita a Vigo que realizou este mércores, Brilhante Días destacou o papel da economía dixital no desenvolvemento de “modelos de negocio de integración de operacións competitivos” a nivel mundial. A este respecto, puxo como exemplo a coordinación entre as fábricas de PSA Citroën de Vigo e de Mangualde (Portugal) e remarcou a dependencia existente entre empresas galegas, como Inditex, e portuguesas.

Así mesmo, o secretario de Estado de Internacionalización luso puxo en valor a “historia” e a “proximidade” entre este país e Galicia e apostou por explotalas co fin de presentar unha oferta común a nivel mundial. Deste xeito, avogou por esta unión para crear unha plataforma que sirva de ligazón “entre o continente europeo e outras rexións do mundo”.

Así mesmo, sinalou que, durante as súas visitas a distintos países á fronte do departamento de Internacionalización, “sempre” percibiu satisfacción respecto de produtos galegos e portugueses.

Tamén incidiu na importancia do sector do automóbil, o téxtil e o agroalimentario nestes dous territorios para os que, ao seu xuízo, é posible satisfacer “moita da demanda que hai en Lationamérica, EEUU, Canadá e África”.