Este sábado día 15, Sábado Corredoiro, celebrarase o IV Certame de Coplas do Entroido organizado pola Asociación Cultural Centáurea, coa colaboración do Concello de Gondomar e a Deputación de Pontevedra. Participarán as comparsas Os Tarteiras de Vigo, Animodo de Domaio, O Zooilóxico de Mañufe e Esensias Parrandeiras de Peitieiros.
A troula iniciarase ás cinco e media da tarde; as participantes sairán en pasarrúas dende a Praza de Abastos, seguindo polo parque da Coelleira até a Praza da Paradela, onde as comparsas interpretarán cadansúas coplas.
O acto será presentado e amenizado polos regueifeiros Kike “o fedello de Xixín” e Mani “o trasno da Fraga”, e ao remate entregarase un agasallo ás comparsas participantes e o premio á mellor valorada polo xurado.
