Un incendio nun camión causa o corte da A-52 á altura dos túneles da Cañiza

O fume impedía a visibilidade no interior dos túneles.

Retención de vehículos na autovía A-52, á entrada do túnel da Cañiza (Pontevedra), en dirección Ourense, polo incendio dun camión.. DXT

Un incendio orixinado nun camión portacoches provocou na mañá deste luns o corte da autovía A-52 á altura do túnel da Cañiza. Segundo informou o 112 Galicia, recibiu varias chamadas de condutores que circulaban pola a autovía A-52, posto que un camión comezara a arder á altura do túnel da Cañiza.

Como consecuencia dos problemas de visibilidade producidos polo fume no interior do túnel, o persoal de mantemento de estradas confirmou ao 112 Galicia que os carrís da A-52 foron pechados en ambos os sentidos.

Ao lugar acudiron medios de extinción para traballar no punto, e patrullas da Garda Civil para desviar aos vehículos e evitar riscos. Do mesmo xeito, os xestores do Centro Integrado de Atención ás Emerxencias de Galicia avisaron aos Bombeiros de Ponteareas, ao GES de Ribadavia, aos axentes da Garda Civil de Tráfico e ao servizo de mantemento da autovía.