Unha persoa quedou atrapada nun camión que envorcou nun accidente rexistrado na mañá deste venres na autovía A-52 ao seu paso polo termo municipal da Cañiza.
Segundo os datos facilitados polo 112 Galicia, sobre as 9,00 horas deste venres unha persoa particular alertou deste sinistro rexistrado no quilómetro 275 da A-52 sentido Vigo ao seu paso pola Cañiza.
As mesmas fontes apuntaron que o camión sinistrado transportaba animais vivos. Por iso, ademais de persoal sanitario do 061, foron mobilizados GES de Ponteareas, Garda Civil de Tráfico, Policía Local, Bombeiros de Baixo Miño e Vigo, así como o GES de Ribadavia.
Por parte do Instituto Armado concretaron que o camión se saíu da vía e envorcou cando circulaban polo quilómetro 275 da A-52 sentido Vigo, debido ao que unha persoa resultou ferida e outra ilesa.
Como consecuencia deste accidente foi cortado un carril de circulación e efectivos de emerxencias procederon a comprobar a situación dos porcos que transporta o vehículo, “bastantes vivos”, indicaron por parte da Benemérita.
