A Garda Civil detivo en Nigrán a catro persoas e tamén investiga a outras dúas como os presuntos autores de máis dunha vintena de roubos durante anos na comarca do Val Miñor.

A maior parte dos roubos con forza foron cometidos en establecementos públicos, bares e cafetarías da zona do Val Miñor, segundo precisou este sábado a Garda Civil nun comunicado.

Os axentes de Baiona-Nigrán foron os encargados de efectuar as detencións o pasado xoves. En concreto, acusaron a seis mozos de entre 18 e 23 anos de estar implicados en 22 delitos cometidos durante 2019 e 2020 nos municipios de Baiona, Nigrán, Gondomar, Tui e Vigo.

Segundo informou a Garda Civil, os mozos detidos contan cun “amplo historial delituoso”. Dezanove dos roubos foron delitos contra a propiedade con forza; un roubo en interior de vehículo, outro de simulación de delito, e outro máis de danos.

O ‘modus operandi’ consistía en acceder aos locais forzando as fechaduras de portas e xanelas. As investigacións concluíron coa recuperación de numerosas caixas de máquinas recreativas e de tabaco, moedeiros e luvas utilizadas nos roubos.

As dilixencias instruídas entregáronse no Xulgado de Instrución 2 de Vigo, así como en Fiscalía de Menores de Pontevedra, ao ser un dos detidos menor de idade cando suceden os feitos.