Axentes da Policía Nacional da Comisaría de Vigo detiveron dous mozos menores de idade, ambos de 17 anos, como presuntos autores dun roubo con violencia, tras propinar supostamente unha malleira a outros mozos para roubarlles as carteiras.

Segundo informaron fontes policiais, os feitos tiveron lugar de madrugada, durante a celebración das festas na parroquia de Candeán. O 091 recibiu unha chamada dun menor de idade, na que denunciou que el e o seu amigo foran vítimas dun roubo con violencia.

Cando chegaron os axentes, decatáronse de que os denunciantes presentaban mazaduras e golpes pola cara, así como danos nalgunhas pezas dentais.

Segundo o seu relato, atopábanse na parte traseira dunha igrexa, cando lles abordaron dous mozos que lles pediron diñeiro. Ao negarse a darllo, os sospeitosos adoptaron unha actitude violenta, suxeitáronlles, forcexearon con eles, e comezaron a golpealos ata que, finalmente, lles substraeron as carteiras.

Coa descrición achegada polas vítimas, a Policía logrou localizar os presuntos ladróns, que se atopaban entre un grupo de mozos nas inmediacións.

Os sospeitosos, menores de idade e veciños de Mos (Pontevedra) e Vigo, foron detidos e trasladados a Comisaría, desde onde os axentes se puxeron en contacto cos seus responsables legais. As dilixencias practicadas foron postas a disposición da Fiscalía de Menores de Pontevedra.