O envío das coordenadas a través do sistema de xeolocalización da aplicación WhatsApp permitiu localizar na mañá deste mércores a unha muller de idade avanzada que quedara atrapada nunha zona de difícil acceso no Rosal (Pontevedra).

Segundo informou o 112 Galicia, a muller camiñaba cun grupo de persoas maiores pola zona de Muiños do Picón e Folón cando torceu un nocello e non puido continuar a marcha. Co fin de enviar a axuda “na maior brevidade posible”, relatan as mesmas fontes, os xestores do Centro Integrado de Atención ás Emerxencias solicitaron á persoa que alertou ao 112 Galicia o envío das súas coordenadas a través da aplicación de mensaxería instantánea.

Despois de ter constancia da localización, os servizos de emerxencia, alertados polo 112 Galicia, puideron acceder ao lugar onde se atopaba a muller seguindo as indicacións facilitadas. Deste xeito, interviñeron os efectivos do 061, a Policía Local e o GES da Guarda. Ademais, por parte do 112 Galicia informouse do ocorrido aos Bombeiros do Baixo Miño, á Agrupación de Voluntarios de Protección Civil do Rosal e aos axentes da Garda Civil.