A Fiscalía pediu que se multe con 210 euros a un delegado do sindicato SIT por agredir a outro representante dos traballadores, de CC.OO., durante a xornada de eleccións sindicais celebrada na planta de PSA Peugeot Citroën o pasado mes de outubro.

O xulgado de instrución número 5 de Vigo acolleu este xoves a vista, tras a denuncia interposta polo delegado de CC.OO. contra o representante do SIT. O Ministerio Público solicitou como pena o pago dunha multa de 210 euros e unha indemnización de 200 euros (a tanto alzado) por un delito leve de lesións ou, alternativamente, por un delito de ameazas.

Así, a Fiscal considerou acreditado que, no día dos feitos –o 22 de outubro de 2018–, o delegado do SIT encarouse co representante de CC.OO. e, ou ben lle deu unha cabezada ou ben fixo ademán de darlla de forma ameazante, polo que o denunciante caeu de costas ao chan.

En todo caso, a acusación pública incidiu en que se tratou dun incidente “leve”, que “se magnificou”, e lamentou que este incidente chegase a xuízo e non se liquidase antes por outras vías.

Pola súa banda, o avogado do denunciante pediu para o acusado multa de 360 euros e unha indemnización de 303,52 euros. Mentres, o letrado da defensa, solicitou que non sexa condenado, ao entender que non se cometeu delito algún.

VERSIÓNS CONTRAPOSTAS

O delegado supostamente agredido manifestou ante o tribunal que o enfrontamento se produciu cando se lle recriminou ao delegado do SIT que pretendese participar nunha reunión de secretarios xerais (convocados para resolver unhas queixas sobre a garantía do segredo de voto nesa xornada de eleccións sindicais), a pesar de que non ostenta ese cargo.

Segundo a súa versión, o denunciado increpoulle mentres se achegaba a el e, ao chegar onde estaba, de fronte, propinoulle unha forte cabezada que lle deu no beizo e o tirou ao chan. Así mesmo, manifestou que tivo lesións na parte posterior da cabeza e no cóbado dereito.

Varias testemuñas desta parte, delegados dos sindicatos UGT e CUT, que se atopaban no lugar e momento do incidente, corroboraron a súa versión dos feitos.

Con todo, outras testemuñas achegadas polo denunciado, que son traballadores afiliados ao SIT, apoiaron a versión deste, moi diferente á do denunciante.

Así, o delegado do SIT asegurou que se produciu unha discusión co outro traballador, pero negou que lle golpeou. De feito, declarou que o denunciante “se tirou ao chan” de forma intencionada, ao seu xuízo, dentro dunha estratexia dos demais sindicatos para “desvirtuar” o resultado desa xornada electoral (na que o SIT volveu revalidar a súa maioría no comité).

Ademais de varias testemuñas que coincidiron en sinalar que o delegado de CC.OO. “caeu ao chan sen que lle golpeasen”, a doutora do servizo médico da fábrica, tamén afiliada ao SIT, corroborou que o denunciante non presentaba lesións evidentes nin estaba mareado.