Xa está aquí a terceira edición do Torneo Internacional Reconquista de Vigo de Fútbol Gaélico. Terá lugar este sábado, 23 de abril, no campo de San Esteban de Beade, e nel participarán, á parte do anfitrión Keltoi Vigo, o equipo irlandés Cavan Stags, o
bretón Lorient GAC e os galegos Condado, Grovias e Fusquenlla.

O torneo internacional de Reconquista de Vigo de Fútbol Gaélico naceu en 2018 co obxectivo de promover a amizade entre os pobos mediante a práctica do fútbol gaélico. Este campionato, de carácter mixto e organizado polo club Keltoi Vigo, é neste momento o torneo internacional en activo de fútbol gaélico máis antigo de Galicia, que recupera a súa celebración tras o parón provocado pola pandemia.

O acceso ao torneo é gratuíto e estenderase desde as 10:00 horas da mañá ata as 18:30 h. da tarde. Prolongarase logo cunha cea e un concerto de folk na Sala Molotov.