Santiago de Compostela xoga “noutra liga distinta”. Así de claro llo quixo deixar o alcalde compostelán, Xosé A. Sánchez Bugallo, ao seu homólogo vigués, o tamén socialista Abel Caballero, nun acto no que contrapuxo os “1.200 anos de historia” do Camiño e o Xacobeo e o seu beneficio para “centos de municipios” fronte ao fenómeno “puntual” para este Nadal anunciado polo rexedor de Vigo.
Caballero presentou o venres un acordo alcanzado con The Walt Disney Company Iberia para converter a rúa Progreso na ‘Rúa Frozen’, con motivo da estrea da segunda parte desta película de animación e da preestrea, que se producirá o 20 de novembro nos cinemas de Praza Elíptica. Nese mesmo acto, o rexedor sacou peito e asegurou que o Nadal vigués “move máis xente que o Camiño de Santiago”, un asunto que Bugallo cinguiu á “estratexia provocativa” do alcalde de Vigo.
“Ten unha estratexia provocativa que lle está dando bo resultado”, afirmou Bugallo, quen no entanto lembrou ao rexedor de Vigo que Santiago espera uns 10 millóns de visitantes o próximo ano, dato que “supera a calquera outra cifra” que se poida esgrimir.
Neste sentido, destacou a “historia” que leva detrás o fenómeno Xacobeo, que achega “rendibilidade por centos de municipios”, e comparouno coa iniciativa “puntual, dunha semana”, que anunciou Caballero, para chancear co “beneficio” que poidan sacar concellos da contorna de Vigo, como Redondela, da preestrea de Frozen 2.
Así, sinalou que Caballero “cumpre o seu papel” e gústalle realizar declaracións deste tipo, pero aclarou que Santiago xoga “noutra liga distinta” e “moito máis seria”.