O Concello de Vigo iniciou os trámites para elaborar un novo prego de concesión do servizo de saneamento e abastecemento de auga, actualmente en mans de Aqualia, e empezou por aprobar a contratación dunha consultoría externa que “apoiará” os labores de redacción do prego que leven a cabo os técnicos municipais.

Segundo explicou o alcalde, Abel Caballero, destinaranse algo máis de 121.000 euros á contratación desta empresa de consultoría, que debe facer unha análise “de situación” sobre o actual servizo, e sobre as “necesidades” que deben recollerse no prego para o futuro.

O rexedor lembrou que o contrato con Aqualia finaliza o 31 de decembro de 2020 (tras unha prórroga aprobada en 2011) e que a intención do goberno local é convocar un concurso novo. “Estamos na fase preparatoria para a liquidación do actual contrato”, afirmou.

Sobre se o novo prego contemplará a tarificación do recibo por consumo (e non como se fai agora, cun mínimo de 30 metros cúbicos, aínda que non se gasten), o alcalde eludiu aclaralo, e subliñou que o contido do prego dependerá da decisión dos técnicos. “Eu escoito moito aos técnicos, que son os que saben. E por iso vai todo ben en Vigo”, proclamou.

En todo caso, o alcalde non quixo deixar pasar a oportunidade de lembrar que outros gobernos, tanto do PP como do BNG, “puideron cambiar o sistema de cobro e non o fixeron”.