A guerra entre a Xunta e o Concello de Vigo é “total”. O presidente da Xunta, Alberto Núñez Feijóo, cualificaba este xoves ao alcalde vigués coma “personaxe” e “ridículo” e este venres foi o portavoz do goberno local, Carlos López Font, quen lle respondeu. “Feijóo entrou en pánico”, dixo.

“Foi pedirlle explicacións dos contratos co seu amigo o narcotraficante e púxose máis nervioso que nunca. Insulta ao alcalde de Vigo”, dixo. “Pode seguir insultando, pero o que queremos é que explique, e iso é o que o pon moi nervioso”, indicou Font sobre a posibilidade de que o concello abra unha investigación sobre as amistades de Feijóo con Marcial Dorado. Ademais, criticou ao presidente da Xunta por non estar cos vigueses a noite do accidente do Marisquiño. “E iso é algo que nunca lle perdoarán os vigueses”, sentenciou.

Pola súa banda, o alcalde de Vigo, Abel Caballero, afirmou sentirse “gravemente insultado” por Feijóo, “que ten esta forma de dirimir os seus propios conflitos”. “Nunca contestei os insultos e non os vou a contestar agora”, rematou.