Os cativos de Bueu constrúen a “vila do mañá”: invadindo espazos para reforzar o sentimento de pertenza

Obradoiro de Urbanismo/ Concello de Bueu

Arredor de trinta nenos e nenas de entre 5 e 12 anos participaron durante toda esta semana en Bueu no obradoiro de urbanismo ‘A vila do mañá’, no que se reflexionou sobre “outra forma de entender as vilas e os lugares que habitamos”.

Desde a concellaría de urbanismo, dirixida por Martín Villanueva, agradécese a colaboración dos pais e nais que decidiron apuntar á rapazada nesta actividade “cuxo obxectivo era impulsar a relación co patrimonio e o urbanismo desde as primeiras idades”.

O obradoiro estivo dirixido pola laureada arquitecta Sandra González Álvarez e o seu equipo ( PØSTarquitectos). Ao longo destes cinco días, traballáronse conceptos como a invasión dos espazos a través de xogos, marcos, espellos, liñas e cintas, elementos tridimensionais e globos, coa idea de que a vila sexa vista como un espazo para a cidadanía e non como unha ameaza, tal e como habitualmente acontece.

Obradoiro de urbanismo/ Concello de Bueu

A iniciativa forma parte dun proxecto da Asociación para a Defensa do Patrimonio Cultural Galego e baséase nas ideas de Francesco Tonucci, que relaciona a infancia co urbanismo e patrimonio das vilas, reforzando así o sentimento de pertenza e identidade co lugar, achegando tamén conceptos sobre planificación urbanística.

DEIXAR UN COMENTARIO

Please enter your comment!
Please enter your name here