Iago Aspas, na lista de Lopetegui: Moaña e o Celta estarán presentes no Mundial de Rusia

A lista complétana De Gea, Reina, Kepa, Carvajal, Odriozola, Piqué, Ramos, Nacho, Azpilicueta, Alba, Monreal, Busquets, Saúl, Koke, Thiago, Iniesta, Silva, Isco, Asensio, Lucas Vázquez, Aspas, Rodrigo e Diego Costa.

Celta de Vigo
Iago Aspas, celebrando as vitorias do Celta en Europa / Miguel Nuñez

Acaba de facerse pública a selección española de fútbol para o Mundial de Rusia, no que participará a principal estrela do Real Club Celta de Vigo, o moañés Iago Aspas, que vén de converterse no máximo goleador español da Liga Santander 2017-2018 con 20 tantos.

Só superado pola voracidade de Messi (pichichi con 34 goles), CR7 e Suárez; quedou por diante de figuras internacionais coma Griezmann (Atlético de Madrid) ou Bale (Real Madrid), o cal non bastou para que o equipo vigués acadara as clasificacións europeas pero si para gañar o prezado billete a Rusia.

A táboa de goleadores só foi un dos numerosos reflexos da calidade do moañés, que quererá cerrar unha tempada excepcional aportando situacións de perigo no mundial deste verán, na súa condición de dianteiro versátil, veloz e con intelixencia para o xogo colectivo.

Iago está a vivir unha segunda xuventude desde que retornou ao Celta tralo seu relativo “fracaso” en Liverpool e Sevilla, onde non conseguiu ser determinante, como o está a ser agora en Vigo de forma superlativa.

A dianteira da selección española complétase con Rodrigo (Valencia) e Diego Costa (Atlético de Madrid). Baixo paus, resulta indiscutible a titularidade de De Gea, e pelexarán por algúns minutos a xuventude do ben cotizado Kepa (23 anos) coa experiencia e saber estar de Pepe Reina, con xa 35 primaveras ás costas pero recoñecido pola súa maneira de alentar aos seus compañeiros.

Na defensa, o equipo titular máis previsible sería Ramos e Piqué coma centrais e Jordi Alba e Carvajal polas bandas; coa versatilidade de Nacho e Azpilicueta como un comodín a ter en conta, alternando distintas posicións da retagarda segundo as necesidades do equipo. Tamén serán da partida Monreal Odriozola, polo que Lopetegui contará cun gran número de efectivos para superar o desgaste das roldas clasificatorias.

Como é tradición, seguramente o apartado máis forte sexa o do centro do campo, con xogadores que poden aportar recursos moi distintos e valiosos: músculo, visión, velocidade, calidade e incluso gol.

Busquets debería ser un titular claro, en compañía de grandes xogadores como Koke, Iniesta (se respecta o físico, pode seguir sendo determinante), Isco, Silva, Thiago, Saúl, Asensio e mais o galego Lucas Vázquez.

Lopetegui mesturou xogadores de tódalas idades na procura do mellor resultado posible, cunha selección en xeral ben recibida polos afeccionados.

1 COMENTARIO

DEIXAR UN COMENTARIO

Please enter your comment!
Please enter your name here