A Gala do Día de Galicia, impulsada tradicionalmente pola Federación de Asociacións Galegas da República Arxentina (FAGRA), homenaxeou de novo este sánado a cultura galaica en chan arxentino e puxo a guinda á segunda edición do ‘Mes dá Galeguidade’, un ciclo de actividades organizadas xunto á Asociación Tuy Salceda de Buenos Aires con motivo do Día da Patria Galega.
O Teatro Bambalinas da Federación, que acolleu o acto, puxo o cartel de completo aos poucos minutos de dar sala ao público que esperaba ás portas no barrio porteño de San Telmo, para gozar da gran festa de Galicia en Bos Aires.
A intensa choiva non evitou que o recinto se atopara cheo de xente para gozar dunha gala dirixida integramente en lingua galega. No seu discurso, o presidente da Federación de Asociacións Galegas, Diego Martínez Duro, agradeceu a importante concorrencia, así como o gran éxito que tivo, sábado tras sábado, o “Mes dá Galeguidade”, no que os arxentinos puideron gozar dos grupos infantís de danza galega, cantareiros e corais da colectividade.
coidar o patrimonio
“Temos que coidar o noso patrimonio e o de todas as nosas institucións, pois é moi importante o que nos deixaron os nosos antepasados. Hoxe tócame a min, mañá tócalle a outro, pero as institucións deben seguir”, dixo o presidente en alusión a casos como o do Centro Galego de Bos Aires que leva anos inmerso nun proceso de notable deterioro.
Seguidamente, as seis agrupacións folclóricas participantes invitaron aos presentes a facer un percorrido musical pola xeografía galega, desde os sons e traxes propios do sur dos conxuntos “Lembranzas do Val Miñor”, “Os demos de Mos” e a “Agrupación Folclórica Baixo Miño”, ascendendo pola costa atlántica ata a proposta do ABC do Partido de Corcubión, cos seus xa tradicionais “Cantos de taberna”, ou a viaxe ao interior do país que propuxeron os grupos anfitrións “Dúas Beiras” e “Estróupele”.
Ademais, a gala supuxo a posta de longo do “Trío Encontro” e a súa música fusión de raíz celta, coa guitarra de Gastón Rodríguez, a percusión de Chelo de Gerli e a gaita do emblemático Daniel Pazos, quen sorprenderon con pezas de creación propia e ofreceron un fin de festa con temas propios do cancioneiro popular galego, na voz de Lorena Lores.Trala función, unha boa queimada galega e rosquillas alimentaron o espírito dos presentes.
