O carril da autovía A-55 cortado ao tráfico na madrugada deste pasado mércores debido ao envorco dun camión que transportaba unhas corenta vacas quedou de noite aberto de novo ao tráfico.

Segundo informou o 112 Galicia, o vehículo envorcara sobre as 3,00 horas do pasado mércores no punto quilométrico 18 da A-55 e foi un particular quen avisou ao servizo de emerxencias. En posteriores comunicacións, outra persoa particular indicou ao CIAE 112 Galicia que o vehículo accidentado tratábase dun camión que transportaba animais.

Tras iso, os xestores do 112 Galicia informaron a Urxencias Sanitarias de Galicia-061, aos Bombeiros do Porriño, á Garda Civil de Tráfico, á Policía Local e a Protección Civil do municipio. Ademais, tamén se puxeron os feitos en coñecemento do Centro de Xestión de Tráfico e do servizo de mantemento de estradas para restablecer as condicións de seguridade da vía.

No lugar, os medios desprazados sinalaron que o camión estaba envorcado sobre o seu lado esquerdo, que xa non había persoas atrapadas e que tiveran que cortar a circulación dun dos carrís da autoestrada en dirección a Vigo.

Ás 7,00 horas deste xoves a Garda Civil de Tráfico avisou ao 112 Galicia de que a circulación estaba normalizada en todos os carrís da vía, despois de que os servizos de emerxencia conseguisen sacar a todos os animais do camión e retiralo da vía.

O persoal de emerxencias que acudiu ao momento confirmou que o condutor do camión foi trasladado a un centro hospitalario e o seu acompañante tamén precisou asistencia.

En concreto, o 061 enviou unha ambulancia de soporte vital básico que trasladou ao Hospital Álvaro Cunqueiro de Vigo aos homes J.C.F., de 67 anos, e I.G.C., de 20 anos, confirmaron a Europa Press fontes sanitarias.