O BNG instou á Xunta a exercer as súas competencias e a atender as demandas do sector pesqueiro do Morrazo, que é “estratéxico” para a economía desta comarca, ante as dificultades que atravesa polo aumento do prezo do combustible e os problemas derivados da pandemia e a guerra en Ucraína.
Así o trasladaron os membros dunha delegación nacionalista (formada pola representante do BNG en Europa, Ana Miranda; e os deputados Rosana Pérez, Carmela González e Paulo Ríos) que este venres mantiveron unha xornada de traballo con reunións con representantes deste colectivo en Cangas, Moaña e Bueu.
Ana Miranda comprometeuse a levar á Comisión de Pesca do Parlamento Europeo aquelas cuestións que afectan a pesca e ao marisqueo desta comarca, porque non se ve “axilidade” na posta en marcha de medidas que solucionen os problemas.
Pola súa banda, Rosana Pérez advertiu de que “a guerra no sector pesqueiro galego comezou hai moitos anos”, porque existen problemas de base “que, se non se solucionan, o sector está abocado a unha diminución maior da que leva sufrindo nos últimos anos”. Así, referiuse a cuestións como a diminución de TAC e cotas, ou á “hiperregulación”.
Para a deputada nacionalista, malia que a Xunta ten moitas competencias exclusivas “non as exerce e sistematicamente bota balóns fóra“. Así, tanto a “falta de política pesqueira” do Goberno galego como de Portos de Galicia causan “un terrible prexuízo” ás terminais pesqueiras galegas.
O BNG denunciou que os traballadores do mar pagan “taxas desmesuradas” sen ter apenas servizos a cambio, e sen que se atendan as súas “reivindicacións históricas” na comarca do Morrazo.
