Audasa, concesionaria da autoestrada AP-9, pechou 2021 cun beneficio de 50,7 millóns de euros, case un 20% máis que antes da pandemia. Fíxoo nun exercicio no que ingresou polo cobro de peaxes un total de 150 millóns de euros, un 29,1% máis que en 2020 e só un 2,1% menos que en 2019, último ano sen restricións de mobilidade polo covid.

A compañía integrada no grupo Itínere fixo públicas este luns as cifras de recadación e tráfico do último exercicio, que a Autoestrada do Atlántico pechou cunha subida de 27,5% respecto ao ano anterior e un descenso do 8,3% no número de vehículos que transitaron pola infraestrutura no ano anterior á crise sanitaria.

Así, a recadación por peaxes achegouse aos niveis prepandemia, aínda que aínda un 2,1% por baixo dos 153,4 millóns de 2019 –3,1 millóns menos–. Respecto de 2020, ano marcado polas restricións da pandemia, Audasa obtivo 22,4 millóns de euros máis en peaxes.

Deste xeito, a compañía concluíu 2021 con 50,7 millóns de euros en beneficio, un 20% que antes da pandemia, resultados que atribúe á redución en 2021 do custo financeiro da débeda, capítulo ao que dedicou hai dous anos case 30 millóns de euros polos 16,1 do último exercicio.

No seu comunicado, Audasa sinala que a subida de tarifas aplicada desde outubro de 2018 para o financiamento das obras en Santiago e a ponte de Rande, así como a volta gratuíta do tramo Pontevedra-Vigo “permitiu recuperar á sociedade 19 millóns de euros sobre un total acumulado a 31 de decembro de 2021 de 357 millóns de euros sen considerar impostos”.

TRÁFICO

2021 foi o sexto ano con maior media de vehículos diarios na autoestrada da década con 22.369. Destes, 19.620 vehículos ao día pagaron peaxes. En canto ás formas de cobro, a telepeaxe foi o método de pago máis común con 84,5 millóns de euros, seguido dos cartóns bancarios con 33 millóns e o efectivo con 16,6 millóns.

Así mesmo, Audasa recibiu 10,8 millóns de euros pola peaxe en sombra dos tramos A Coruña-A Barcal e Vigo-O Morrazo, así como 14 millóns de euros polas bonificacións aprobadas polo Mininsterio de Transportes.

Por contra, abonou 3 millóns polos descontos do 75% para traxectos do tramo entre Vigo e Pontevedra nas viaxes de volta no mesmo día laborable –ata o 29 de xullo– e outros 5,6 millóns polos descontos do 25% para vehículos lixeiros en viaxes de ida e volta pagados con telepeaxe.