O grupo municipal Marea de Vigo denunciou este venres que a prórroga da concesión do servizo de bus urbano a Vitrasa supuxo a eliminación dunha cláusula sobre a compensación á empresa en caso de baixada do número de viaxeiros, e que as condicións se volven rexer polo prego orixinal, de 1994, o que é moito máis gravoso para a administración local.

Nunha rolda de prensa, o portavoz do grupo, Rubén Pérez Correa, advertiu de que, coa perda de viaxeiros, a empresa pode imputar directamente ao billete todos os custos adicionais nos que incorra. “O alcalde mente porque sabe que vai haber esa compensación”, sinalou.

Pérez Correa lembrou que o propio alcalde anunciou en decembro pasado que a revisión de tarifas do bus suporía un incremento de 5 céntimos, pasando o billete ordinario de 1,35 a 1,40 euros, aínda que matizou que esa suba sería asumida polo Concello no caso dos usuarios do cartón PassVigo.

Con todo, esa actualización aínda non se fixo efectiva, o que leva ao portavoz de Marea a sospeitar que “debe haber unha batalla gorda” entre Concello e concesionaria que, apuntou, expón que o prezo do billete debe estar “moi probablemente” por enriba de 1,50 euros.

Así mesmo, vinculou esta situación co conflito laboral en Vitrasa e co anuncio da empresa de que activará o ‘descolgue salarial’ e a inaplicación do convenio para reducir custos, porque a perda de viaxeiros pola pandemia pon en risco a súa supervivencia e o mantemento do emprego.

Marea de Vigo acusou a concesionaria de utilizar os seus traballadores como “cortina de fume” e para presionar ao Concello nas súas pretensións económicas.

Preguntado acerca desta denuncia, o alcalde, Abel Caballero, evitou pronunciarse alegando que non coñece con detalle as manifestacións de Marea, aínda que insistiu en que o novo prezo do billete de bus xa está fixado e o aumento “non lle custará nada” aos cidadáns que teñan PassVigo.

PETICIÓN DE REUNIÓN

Por outra banda, o comité de empresa da concesionaria solicitou unha reunión co rexedor, despois de que este expresase o seu rexeitamento ás intencións da empresa de recortar salarios e aumentar a xornada anual ao seu persoal.

“A representación sindical solicita unha reunión co alcalde para explicarlle de primeira man a situación e buscar unha posible solución”, trasladou o órgano de representación.

Todos os sindicatos expresaron o seu rexeitamento á proposta de descolgue da empresa, e instaron a Vitrasa a abandonar a concesión.