O Porto de Vigo impulsou a creación dun Comité de Benestar Portuario para ofrecer “a maior atención posible” ás persoas vinculadas co mar que “nalgunhas ocasións non foron tidas en conta como se debería e moitas veces quedaron esquecidas as súas necesidades”.
Así o sinalou o presidente da Autoridade Portuaria de Vigo, Jesús Vázquez Almuiña, que avogou este luns por defender o benestar deste colectivo dentro da nova estratexia de Crecemento Azul 2021-2028.
Para iso, a institución apostou pola creación do Comité de Benestar Portuario co obxectivo de “dar exemplo” e coordinar todos os medios necesarios para ofrecer á xente do mar “a maior atención posible”.
Esta mañá levouse a cabo a primeira toma de contacto entre os principais organismos que formarán parte do futuro comité, entre os que se atopaban responsables do Porto, da Policía Local e Nacional, da Garda Civil, da Capitanía e Salvamento Marítimo, do Instituto Social da Mariña, do Centro de Atención ao Mariño de Vigo, da ONG Accem, da Federación Internacional de Transporte, da Cruz Vermella ou do Hospital Álvaro Cunqueiro, entre outros.
“O futuro Comité de Benestar do Porto de Vigo pretende ser un lugar de encontro baseado no diálogo fluído e onde se dea solución aos múltiples obstáculos aos que ten que enfrontarse este colectivo día a día. En definitiva, facilitar o acceso dos traballadores do mar aos servizos en terra, melloralos e detectar novas necesidades para facilitar así a estancia no Porto e na cidade”, subliñou o Porto de Vigo nun comunicado.
Segundo Vázquez Almuiña, o traballo no mar é “duro e esixente” xa que a maioría das veces os barcos pasan “moitas semanas, e mesmo meses” sen atracar no porto. Ademais, indicou que cada vez máis os traballadores son máis diversos e de diferentes países.
“En moitas ocasións teñen dificultades para integrarse debido ao idioma, aos diferentes costumes ou aos arraigamentos culturais, polo que consideramos primordial que cando cheguen ao Porto de Vigo estean como en casa”, reivindicou.
A creación do Comité foi “moi ben acollida” por todos os organismos presentes nesta primeira reunión, acordando seguir traballando co obxectivo de pór en relevo a importancia do Porto como axente integrador na cidade.
