Os sindicatos CC.OO. e UGT trasladaron este martes ás rúas de Vigo as protestas contra o “despezamento” do servizo de Correos, cunha caravana de vehículos que percorreu varias rúas do centro da cidade, e coa que pretenden denunciar a “traxectoria de recortes” do Goberno central con respecto a este servizo.

A protesta enmárcase no calendario de mobilizacións que se iniciaron o pasado mes de abril en todo o Estado con concentracións de delegados. CC.OO. e UGT volveron a reclamar á Dirección de Correos “que cese a política de despezamento” do operador público e piden un servizo “sustentable, eficaz, moderno e eficiente”.

Segundo denunciaron, “o claro cambio de rumbo” na compañía pública nos últimos meses traduciuse, na provincia de Pontevedra, en recorte de emprego en case todos os centros de Correos, como na Estrada, O Porriño, Vilagarcía, Val Miñor, Ponteareas, Redondela, Vigo ou Pontevedra, e no peche de oficinas na quenda de tarde dos sábados.

Os sindicatos criticaron a “nefasta xestión e errático liderado” do presidente de Correos, Juan Manuel Serrano, que levan o ente público a ter unha previsión de perdas económicas “de ata 634 millóns de euros en 2023”, fronte ao resto de operadores europeos, que “demostraron un crecemento económico” na pandemia e co auxe do comercio dixital.

“Ademais, está a recortar emprego e empeorando a súa calidade (3.000 efectivos menos anuais, 36 % de temporalidade, e 25 % de emprego a tempo parcial en xeral, e un 75% na rede de oficinas, así como un 50% nos centros de clasificación e tratamento postal); e está a reducir a rede postal pública mediante o peche de centros de traballo, oficinas e suprimindo postos de repartición rural“, engadiron os sindicatos.

Por iso, esixiron ao Goberno que teña en conta ao operador postal na repartición de fondos europeos de recuperación, incorporando o servizo á axenda política, ao ser “esencial para a cidadanía”, e reclamaron que se considere o “carácter estratéxico” de Correos “para un proxecto de transformación e modernización de país”.