A Consellería de Infraestruturas e Mobilidade da Xunta de Galicia iniciou as obras de mellora dos accesos aos hospitais Meixoeiro e Nicolás Pena, que contarán cun investimento de 700.000 euros e estarán acabadas cara a finais de ano.
En ambos os casos reforzarase a seguridade viaria e mellorarase a accesibilidade de pacientes e traballadores dos centros. Así, actuarase en vías interiores (con renovación do firme e das beirarrúas) e nos espazos de entrada aos hospitais. Segundo detallou a Xunta, está previsto habilitar máis dunha vintena de pasos de peóns.
As obras comezaron nos accesos ao hospital Meixoeiro, onde se habilitará unha nova vía para facilitar as comunicacións dentro do propio recinto. Este tramo fará máis fácil a subministración de material ao propio hospital, evitando que os vehículos teñan que saír marcha atrás ou por dirección prohibida.
No caso do Hospital Nicolás Pena, está previsto mellorar o aparcadoiro e actuar nos itinerarios peonís para mellorar a accesibilidade e facilitar os desprazamentos a pé. Tamén se mellorará a sinalización e reporanse valos peonís e bolardos.