A empresa Mariña Meridional, propiedade do vigués José Alberto Barreras Barreiras, presentou a única oferta pola unidade produtiva do estaleiro vigués Vulcano (en proceso de liquidación), unha oferta que ascende a 7,85 millóns de euros, segundo confirmaron fontes xudiciais.

O prazo de presentación de ofertas polo estaleiro venceu o pasado luns e a de Mariña Meridional, empresa dedicada, entre outras actividades, á explotación de buques, foi a única presentada.

Agora o xulgado do Mercantil 3 de Pontevedra, con sede en Vigo, trasladará a oferta á administración concursal de Vulcano para a súa análise e para corroborar que dita oferta axústase ao plan de liquidación do estaleiro, aprobado xudicialmente. No caso de que así sexa, Mariña Meridional (do Grupo Xestión de Negocios Argos) será a adxudicataria.

A empresa é propiedade do vigués José Alberto Barreras, que xa foi socio de Vulcano e tamén accionista de Pescanova (de feito, chegou a estar imputado na investigación da quebra da pesqueira, que se xulga na Audiencia Nacional, aínda que se arquivou a causa con respecto a el), ademais de socio do Banco Pastor.

Actualmente, está vinculado con decenas de sociedades, entre elas a cotizada Montebalito, dedicada á promoción inmobiliaria e con ramificacións en varios países.