A Asociación de Industriais Metalúrxicos de Galicia (Asime) e a plataforma de empresas auxiliares afectadas pola situación de Hijos de J. Barreras volveron a urxir este luns unha solución á crise do estaleiro, e constataron que algunhas destas empresas están “preto” de solicitar preconcurso de acredores.
Así o trasladaron tras unha xornada de reunións cos sindicatos UGT, CC.OO. e CIG, e advertiron de que é necesaria unha “saída urxente” á situación “nun máximo de 48-72 horas”. “Hai capacidade suficiente en Galicia para terminar os proxectos de Barreras e é fundamental que se satisfagan as débedas coa industria auxiliar, que ascenden a máis de 20 millóns de euros”, sinalou o secretario xeral de Asime, Enrique Mallón.
Mallón volveu a insistir en que a industria auxiliar “non pode aguantar moito máis” e lembrou que se rescindiron máis de 700 contratos e varios centos máis están pendentes de que Barreras peche a súa crise.
Na mesma liña, o portavoz da plataforma de empresas auxiliares (que aglutina a 32 firmas), Alberto Rocha, incidiu en que esta industria “está a expensas das decisións dos demais actores” e sinalou que estas empresas están a asumir un papel que non lles correspondería, “pero que se fai necesario pola urxencia da situación”.
“Incidimos na conveniencia da venda de accións ou ampliación de capital, e trasladamos a disposición total da industria auxiliar a cumprir cos encargos contratados”, engadiu Alberto Rocha.
SINDICATOS
Pola súa banda, os sindicatos coincidiron en sinalar a necesidade dunha solución rápida, xa que varias empresas auxiliares empezaron a negociar e algunha se ve xa “sen liquidez” para afrontar pagos.
O secretario xeral de Industria de CC.OO. en Vigo, Celso Carnero, expresou as “dúbidas” deste sindicato acerca dunha pronta solución, e da entrada do fondo Oaktree no accionariado de Barreras (que actualmente conforman PMI, filial de PEMEX, co 51 %; as empresas de José García Costas e o grupo Albacora, que se reparten a partes iguais o 49 % restante).
Segundo apuntou Carneiro, “parece máis preto a liquidación” que outra saída, e expuxo, se se dá “o peor escenario posible“, que o estaleiro contrate a traballadores da industria auxiliar que queden fose das empresas para acabar os proxectos. “Se a industria auxiliar cae, quen vai facer os barcos?”, cuestionou.
Por outra banda, recalcou a importancia de convocar a mesa sectorial do naval, “parada desde 2009”, e pediu que se cre un fondo de garantías recíprocas, para que as empresas auxiliares teñan seguridade á hora de cobrar os traballos nos estaleiros. Finalmente, advertiu de que, aínda que Barreras cambie de propietarios, “haberá que facer un investimento para pagar ás auxiliares”, que non poderán “soportar máis quitas”.
Mentres, o portavoz de UGT, Rubén Pérez, subliñou que, aínda que é necesario facer unha análise global do sector, “neste momento o prioritario é buscar unha solución á situación de Barreras”, algo que a mesa do naval non pode liquidar.
Finalmente, o responsable do naval na CIG, César Rodríguez, confirmou a “complicada situación” das empresas auxiliares, varias das cales poden solicitar o preconcurso “en calquera momento”. Así mesmo, volveu a insistir na “responsabilidade” da Xunta, que “apoiou a este consello de administración” de Barreras. A ese respecto, reiterou que, ou ben os novos donos do estaleiro ofrecen un “proxecto serio, de futuro”, que contemple acabar todos os barcos, ou a Xunta deberá intervir e entrar no accionariado.
