A Xunta de Goberno Local do Concello de Vigo deu luz verde este venres a un novo modificado da obra de reforma da bancada de Marcador, no estadio municipal Abanca Balaídos, por valor de pouco máis de 3 millóns de euros, para a aplicación de medidas de seguridade e outros axustes, de maneira que o prazo da obra amplíase de novo e estará rematada cara a mediados de marzo.

O alcalde, Abel Caballero, explicou que, debido á situación da bancada, necesítase un novo estudo da estrutura para executar medidas que garantan a seguridade. Iso débese a que, ao non estar reformada a bancada de Gol, a zona de Marcador deberá soportar un vento “que non se calculou ao principio”.

Por tanto, indicou que hai que substituír tabiques, reducir “cargas mortas” e axustar outros elementos para garantir a seguridade. Así mesmo, tamén se modificará a obra no que respecta a unha parte do cableado e será necesario construír un pozo de bombeo para augas fecais “co que non se contaba”.

O rexedor explicou que este modificado supón ampliar o prazo de execución da obra (que se iniciou en marzo de 2021 e debía rematarse cara a finais deste ano) noutros tres meses. A maiores, explicou que outras circunstancias incidiron no atraso: a folga de transportes, que atrasou a obra catro semanas; ou o concerto de Muse, que paralizou os traballos máis de tres semanas.

Finalmente, confirmou que a nova bancada de Marcador estará dispoñible para a fin de semana do 10 de marzo de 2023 e que, inmediatamente despois, iniciarase a tramitación para adxudicar a reforma da bancada que falta, a de Gol.

CANDIDATURA PARA O MUNDIAL

Por outra banda, en relación coa candidatura conxunta de España e Portugal para albergar o Mundial de Fútbol de 2030, Abel Caballero sinalou que Vigo e Balaídos seguen optando a ser sede e asegurou que, na súa opinión, o estadio vigués ten “moitas posibilidades” de ser elixido. Con todo, matizou que deben acometerse cambios para permitir aumentar a capacidade, de forma temporal, ata os 40.000 espectadores.

Tras apuntar que a Xunta lle informou “fóra de prazo” para preguntar se Vigo quería optar a ser sede, o alcalde referiuse ás declaracións de Alfonso Rueda sobre a disposición do goberno galego a apoiar as candidaturas galegas (Balaídos e Riazor).

“Que ten que achegar algo (a Xunta) é unha obviedade, pero non sabemos canto vai achegar. Cando o saiba, valorareino”, afirmou o rexedor, quen aproveitou para lembrar, unha vez máis, que a Xunta “non achega nin un céntimo” ás obras de reforma de Balaídos, “a máis importante icona deportiva de Galicia”.