O Celta de Vigo anunciou este xoves que alcanzou “un acordo de redución salarial” cos integrantes do corpo técnico e xogadores do primeiro equipo e do filial, o cal a entidade que preside Carlos Mouriño considera “necesario” tras o cesamento de actividade motivado pola declaración do Estado de Alarma en España para frear ao Covid-19.

“O RC Celta, tratando de actuar coa máxima coherencia e responsabilidade, dá un importante paso para afrontar coas maiores garantías posibles o suposto de que a competición de Liga non se poida renovar” destaca no seu comunicado o Celta, que tamén aplicará esta redución ao resto de empregados que superen unha cantidade económica que non quixo desvelar.

O club celeste tamén agradece aos seus principais patrocinadores -Abanca, Hijos de Rivera (Estrela Galicia e Cabreiroá) e Adidas- a súa “comprensión, disposición e compromiso” ante a actual situación. O “gran reto” do Celta nestes momentos é “axudar e achegar” a frear a epidemia, por iso puxo en marcha diferentes iniciativas encamiñadas a colaborar coa sociedade nesta “dura loita” contra o Covid-19.