A XIX edición do Festival de Cans, no Porriño, regresará en 2022 ás súas datas habituais de primavera e terá lugar entre o mércores 18 e o sábado 21 de maio, de modo que volverá coincidir en datas co Festival de Cannes francés, como xa é tradición.
Así o decidiu a Asociación Cultural Ansia, organizadora do certame, e así llo foi xa anticipando nos últimos días aos veciños que prestan as súas casas e galpóns, ademais da as principais institucións que apoian o evento, como o Concello do Porriño, a Deputación de Pontevedra, a Xunta e o Ministerio de Cultura e Deporte.
Deste xeito, a organización xa traballou nas últimas semanas nos contidos e no deseño da que será a XIX edición, que seguirá inicialmente as liñas das dúas últimas, dando maior relevancia ás proxeccións de cinema, ás actividades, aos encontros e coloquios e ás actividades diúrnas, pero sen renunciar ás actuacións musicais.
En 2020 e 2021, o Festival de Cans trasladouse ao mes de setembro ao verse condicionado polas circunstancias da pandemia, pero agora a organización traballa “coa máxima prudencia” e a experiencia adquirida durante esta crise levará a ter “marxe para tomar decisións en cada momento”, en función do que determinen as autoridades sanitarias. Ademais, o certame avanza que nos próximos días abrirase o prazo de envío de curtametraxes e obras a concurso.
BALANCE DE 2021
A organización do Festival de Cans fai un balance “moi positivo” da edición de 2021, que alcanzou a cifra de 7.500 espectadores. De todos eles, uns 6.000 foron de maneira presencial á parroquia porriñesa, mentres que outros 1.500 seguiron o evento virtualmente, unha vía que se “seguirá potenciando” en 2022.
Ademais, o Festival realizou o pasado ano 121 contratacións laborais e adxudicou servizos a case 50 empresas locais, ademais de contratar directamente 140 habitacións a diferentes establecementos hoteleiros.
Outra das actividades que o Festival impulsou neste 2021 foi o ciclo ‘Cinemaldea’, que levou unha selección das curtametraxes premiadas en Cans a todas as parroquias do Porriño e conseguiu que asistisen a estas proxeccións un total de 250 persoas.
