O Festival de Cans abriu este xoves a convocatoria de envío de obras para o concurso do seu XVIII edición, na que se abre a sección ‘Novas Camadas’ aos directores menores de 25 anos e que este ano outorgará 9.600 euros en premios.

Esta nova edición do festival volverá celebrarse na primeira semana de setembro, despois de que a asemblea da Asociación Cultural Arela, entidade organizadora, decidise aprazar esta cita, como ocorreu o ano pasado, en lugar de regresar ás tradicionais datas en marzo.

A convocatoria estará aberta ata o próximo 16 de maio nas categorías de curtametraxes de ficción, animación ou non ficción e videoclips. Todas as obras deben ser de produción galega e teñen que ser realizadas entre os anos 2020 e 2021.

En atención á boa acollida que tivo o Premio Deleite ‘Novas Camadas’, para promover directores menores de 25 anos, este ano abrirase desde o inicio a participación para esta sección do concurso –o pasado ano foi mediante invitación–. O festival tamén recibirá longametraxes e calquera obra susceptible de ser programada ou presentada nas seccións paralelas do festival. Como na edición anterior, haberá catro xurados específicos para outorgar os galardóns.

Entre todas as categorías do concurso repartiranse 9.600 euros en premios –500 euros máis que na edición anterior– e o característico Can de Pedra, realizado polo artesán Paco Candán. A organización indicou que se incrementou a dotación económica dos galardóns para ofrecer “unha axuda determinante a creadores nun momento moi complicado”.